Rev 12 | TUCT | STEP | Ra naghita gabua ee ivot izi sambam imin ilaal. Gabua tawe, puughu tiina. Livaa ee inonogh ghi pa aaz, ve iyooz izala kaiyo. Ve pitum saŋavul ve ru tigheen izala daaba imin moghar ndamoonda.

bDan 7:7

dDan 8:10

eLu 2:6+; Mbaŋ 1:9+; Pil 2:9+

g1King 17:1+; Dan 7:25; Syg 11:2+, 13:5

iDan 10:13,21

jLu 10:18; Yo 12:31; 2Kor 11:3; Syg 20:2+

lYop 1:9+, Sek 3:1

mYo 12:25; Ro 16:20; 1Yo 5:4; Syg 7:14

nIgham 19:4; 1King 17:1+; Dan 7:25; Syg 11:2+, 13:5

oSyg 1:9, 11:7, 13:7, 14:12

Revelation of John 12

Livaa ve moot tiina

1 Ra naghita gabua ee ivot izi sambam imin ilaal. Gabua tawe, puughu tiina. Livaa ee inonogh ghi pa aaz, ve iyooz izala kaiyo. Ve pitum saŋavul ve ru tigheen izala daaba imin moghar ndamoonda. ^{▼▼(12:1-3) Livaa tau saveeŋ ziiri tane isavia na, izaa to Maaron tamtamon tooni, ve moot izaa to Sadan.}

2 Livaa tawe aapo ve ighe ipoop. Tauvene iyamaan yavyavuuŋ tiina ve iyakyak.

3 Malau mako ve gabua ite ivot izi sambam imin ilaal. Naghita moot tiina ee. Tiini siŋsiŋai imin yav ŋgilaaŋi. Ve daaba liim ve ru, ve zooŋa saŋavul. Ve moghar ndamoonda liim ve ru imin to yes kinik tigheen irau daaba liim ve ru tawe. ^b

4 Pitum tau tigheen sambam we, moot tawe iighu izuur ŋgun ee, ve isik zi tizila taan. Ve ŋgun ru tigheen poi. Ra moot tawe ila iyooz izi livaa tana naagho ve isasaŋani. Ighe ipoop, mako rekia mon ve itoon naatu. ^{▼▼(12:4) Livaa naatu, ene Mesia, Yesu Krisi. Sadan loolo pa Mesia ivot ve igham uraat tooni mako. Ve i iwatagh: Mesia pale ivot ila to Maaron tamtamon tooni. Tauta saawe to Adam ve ilam saawe to Krisi, Sadan monmon ipaburigin tamtamon pa ravuuŋ yes tau titaghon Maaron ŋgar tooni. I itoova to irav Yesu imaat paam. Eemon ŋgar tooni tawe ighur mako. Pasaa, Yesu iburig pa mateegh. Tauta saawe tana ve ilam, Sadan iliil eez pa ravuuŋ Krisi tamtamon tooni. Eemon Maaron pale maata pazi.
,} ^d

5 Livaa tana ipoop naatu tamoot. Naatu tawe pale iŋgin nughmariŋ, ve pooz tooni pale ariaaŋa kat. Tauta moot ighe iravu imaat. Eemon Maaron indae izala, ve ighuru ileep ila niima tapir igharau niia to ghamuuŋ pooz. ^e

6 Ra livaa tawe ighau ila ve ileep izi nugh ŋginaaŋa. Ene nugh tooni to lepoogh tau Maaron tauu ighuru pani pataghaaŋ. I pale ileep ta sewe ve Maaron iŋgini pa lepoogh tooni irau mboŋ 1260. ^{▼▼(12:6) Muuŋ, propet Ilia ileep izi nugh ŋginaaŋa irau ndaman tol ve sirivu. Saawe tana, Maaron maata pani ve iŋgini pa lepoogh tooni. Ve muuŋ, kinik saghati ee to yes Grika, eeza Antiokus Epipanes, ighe igham yes Israela tipul ghuruuŋ ila toozi. Tauvene ighur pataŋani tiina kat pazi irau ndaman tol ve sirivu. Tauvene, ndaman tol ve sirivu, ma mboŋ 1260, ma kaiyo tamoot ru geege ru, ene izaa to saawe tau ŋgar saghati ivot imin tiina ve igham pooz, ve tamtamon to Maaron tileep ila pataŋani tiina loolo. Saawe tauvene, Maaron pale maata pa tamtamon tooni.
,} ^g

7 Malau mako ve naghita malmal tiina ivot izi nugh sambam. Mikael ^{▼▼(12:7) Mikael, ene aŋela ee tau eeza tiina kat. I iŋgin Maaron tamtamon tooni, ve imuŋmuuŋ pa zaaba to Maaron.}

tomania aŋela tooni tipaburigin malmal pa moot tiina tawe ve aŋela tooni. Mako moot tomania aŋela tooni anazi tipamuul malmal pazi. ⁱ

8 Eemon tapirizi irao mako. Tauvene moot tomania aŋela tooni irau tileep izi nugh sambam muul mako, ve tisik zi tizila pa taan. Moot tawe ileep muuŋ geeg ve ilam. Tiwaat eeza tighe Sadan ma Ŋeer Saghati. I ta itotombaan tamtamon to taan tisov, ve ighegherev zi pa ghamuuŋ ŋgar sasaghati. ^j

10 Ra nalooŋ bobaaŋ tiina ivot izi sambam tighe: “Aazne, Maaron toit igham mulin tamtamon tooni gha tileep poia, ve itotoi tapiri tomania pooz tooni ivot ighazooŋ wa. Ve ighur gabua naol isov tileep ila Mesia tooni saamba, leso iŋgin zi. Pasaa, Ŋeer Saghati tau mboŋ mataaz iŋgalŋgal saveeŋ ^{▼▼(12:10) Sadan eeza, ene puughu tauvene: ‘Ŋeer to ŋgaliiŋ saveeŋ’.}

pa toŋvetaz toit ila Maaron naagho na, ene tiziire pa nugh sambam, ve tisiki izila taan wa. ^l

11 Toŋvetaz toit tigham ŋgar pa lepoogh poia to taan mako, ve tiroi pa mateegh mako. Tirei tauzi kat. Ve Sipsip to Maaron siŋ tooni ipalot zi le tiyooz ariaaŋ pa votiaaŋ saveeŋ onoon ila ila le irau mateegh toozi. Tauta tiliiv Ŋeer Saghati wa. ^m

12 Tauvene yam tau aleep izi nugh sambam na, tintinmim ve lolomim poia. Eemon yam to taan ve yam to te, ayamaan gham. Pa Ŋeer Saghati ta izilat na. Ve i iwatagh ighe saawe tooni ilam igharau wa. Tauvene aate yavyav kat.”

13 Moot ighita tisiki izi taan wa. Tauvene ila inaan livaa tau ipoop naatu tamoot na ighe ighur pataŋani pani. 14 Eemon tigham livaa tana le baage ru imin manbog, leso iroov ila niia to lepoogh ta nugh ŋginaaŋa we, ve ileep malau pa moot. Ve Maaron pale maata pani, ve iŋgini pa lepoogh tooni irau ndaman tol ve sirivu. ⁿ

15 Tauta moot inaan livaa tana ve yaa tiina goŋia ivot pa aavo, leso izughu gha ilale. 16 Eemon taan iuule, ve ikaak aavo ve ighun makoi yaa tau ivot ila moot aavo na. 17 Tauvene moot aate yavyav kat pa livaa tawe, ve ila ipaburigin malmal pa livaa paaghu tooni siriv. Ene yes tau matazi kisin tutuuŋ to Maaron ve titaghoni, ve tivotia ghuruuŋ ila toozi ighazooŋ tighe tighur ila to Yesu. 18 Ra moot tana ila iyooz izi nari. ^o